• image
  • image
  • image
  • image
  • image
  • image

ҚР Парламент Мәжілісінің депутаттары «ҚТЖ» ҰК» АҚ нысандарымен танысты

ҚР Парламент Мәжілісінің депутаттары «ҚТЖ» ҰК» АҚ нысандарымен танысты 07.09.2016

7-қыркүйекте ҚР Парламент Мәжілісінің депутаттары «Қазақстан темір жолы» ҰК» АҚ-ның Астанадағы нысандары – «Астана» көліктік-логистикалық орталығы (КЛО), «Локомотив құрастыру зауыты» АҚ, «Тұлпар-Тальго» ЖШС және «Темір жол көлігі персоналын бағалау және дамыту орталығын» аралады.

Өндірісті аралаған депутаттарды жеңілдікпен кедендік ресімдеу жайы қызықтырды. «Астанадағы КЛО Орта Азиядағы «А» сыныбындағы кешенді логистикалық және «бір терезе» арқылы қызмет көрсететін орын. Бүгінгі таңда логистикалық орталық 70% көлемінде қызмет атқаруда»,-дейді "Continental Logistics" ЖШС бас директоры Ерлан Шаймарданов. Ол сондай-ақ, орталықтың қойма жүйесі қазіргі заман талабына сай екендігін, жаңа құрылғылармен қамтылғандығын, аумақ арқылы тәулігіне 1000 паллет жүкті түсіріп-тией алатындығын атап өтті. Депутаттардың пресс-туры барысында «Локомотив құрастыру зауыты» мен «Тұлпар-Тальго» кәсіпорындарының өнімдері көрсетілді. Отандық дизельді локомотив зауыты 2009 жылдан бері 300-ден астам ТЭЗЗА тепловоз шығарды. Қазіргі таңда мұндай техникалар Қырғызстан, Тәжікстан, Украина, Түркменстан темір жолдарында жүйткіп жүр. «Биылғы 9- қыркүйекте Душанбеге кезекті екі тепловоз жіберіледі. Ол «Локомотив құрастыру зауыты» АҚ мен«Рохи Охани Точикистон» МУК арасындағы төрт тепловозды алу келісімі бойынша атқарылады»,-дейді «Локомотив құрастыру зауыты» АҚ өндірістік мәселелер жөніндегі вице-президенті Төлеген Жаңабаев. «Тұлпар-Тальго» жолаушылар вагондарын құрастыру зауыты 2011 жылы ішкі сұранысты қанағаттандыру мақсатында іске қосылған болатын. Кәсіпорын халықаралық сапа талабына сай келеді. Оның жылдық өндірістік қуаты 150 вагон құрастыруға жетеді. «Мұнда тұтынушылардың сұранысына орай тұңғыш отандық вагонның жаңа түрі жасалды. Вагонның ені мен биіктігі және жалпы көлемі, сыйымдылығы ұлғайтылды. Сонымен қатар мүмкіндігі төмен жолаушыларды тасымалдауға вагондар қарастырылған»,- деп атап өтті «ҚТЖ» ҰК» АҚ бас инженері Бауыржан Орынбасаров. Қазіргі таңда жолаушылар пойыздары 12 жүрдек бағдар бойынша қатынайды. Олардың қатынау уақыты екі есеге дейін жеделдетілді. Сондай-ақ депутаттар ТМД аумағындағы баламасыз «ҚТЖ» ҰК» АҚ филиалы – «Темір жол көлігі персоналын бағалау мен дамыту орталығында» болды. Орталықтың зертханасы мен алаңы соңғы үлгідегі құрал-жабдықтармен, «ҚТЖ» ҰК» АҚ компаниялары тобындағы кәсіпорындарында өндіріске енгізілген темір жол техникалары тренажерлік құралдарымен қамтылған. 3D- бағдарламалық үлгісімен қамтылған зертхана темір жол көлігіндегі өндірістік үдерістердің көрінісін толық бере алады. ҚР Парламент Мәжілісінің депутаттары мемлекеттік индустриялық бағдарлама аясындағы темір жол көлігі машиналарын жасау кәсіпорындары кластерін құрудағы «ҚТЖ» ҰК» АҚ ұжымы жұмысын жоғары бағалады.

Тізімге оралу