Жаңалықтар

Қазақстандық тепловоз Тәжікстанның жаңа жолында тұңғыш пойызды сүйреді

Душанбе- Қорғантөбе – Куляб жаңа темір жол желісінде тұңғыш пойызды Астана локомотив құрастыру зауытынан шыққан ТЭЗЗ №0300 сериялы тепловоз сүйреді. Тәжікстандағы жаңа темір ол желісі биылғы жылғы тамыздың соңында пайдалануға берілген болатын. Ол елдің оңтүстігін астанасымен жалғайды. Жаңа құрылыс нысанын пайдалануға беру барысында үш тоннел мен соңғы үлгідегі сегіз көпір тұрғызылды. «2012 жылдан бері тәжік теміржолшылары біздің төрт локомотивті табысты пайдаланып келеді. Жыл басында «ҚТЖ» ҰК» АҚ мен «Рохи Охани Точикистон» МУК арасында Тәжікстанға «Evolution» сериясындағы екі тепловозды жеткізу туралы келісім шарты жасалды. Осы келісімге орай, қазіргі кезде бір тепловозды жеткіздік»,-дейді «Локомотив құрастыру зауыты» АҚ техникалық мәселелер жөніндегі вице-президенттің қызметін атқарушы Виктор Перминов. Тәжікстандық сарапшылардың пайымдауынша, жаңа технологияға негізделген қазақстандық тепловоздар өндірістік көрсеткішінің үздік үлгісін танытуда. Қазақстандық өнім Тәжікстанда №1 дәрежеге ие.